島上遇到貓 ~ 塞班島

上年見到HK Express有直航機去塞班島, 好想再去過影貓. 因為當年去嘅時候, 仲未用DSLR, 好多貓都係見到影唔到.

無奈只係影到3隻.

當年本來想去關島, 塞班島同天寧島, 但去到關島時, 去天寧島的船好似有事停左, 緣慳一面. 沖繩列島都算近岸地, 塞班島等等幾個島就在幾乎在太平洋中心, 真係唔知D古人點解會飄到去果度定居.

關島同塞班島, 風景不相伯仲, 但我會鍾意塞班島多過關島. 關島太過商業化, 塞班島就比較鄉村. 我地去嘅時候, 响關島不時會聽到廣東話,  塞班島就係零廣東話. 除左我地坐玻璃船睇珊瑚時, 導遊姐姐係日本人, 其中一個助手見我地香港人, 就同我地講廣東話, 不過佢係廣州人.

雖然當年日本遊客已淡出, 但响關島同塞班島都仲係好多人第一句就同我地講日文. 今時今日, 或者已轉講晒普通話吧. 租車嘅見到, 以為我地係日本人. 當年我仲有美國車牌, 拎出黎時又以為我地係美國人.

*香港運輸署國際車牌申請表(TD51: http://www.td.gov.hk/tc/public_forms/td_forms/driving_licence/index.html)上面國家同地區既列表, 係見唔到關島或塞班島, 所以需唔需要拎國際車牌, 我諗最好都係問清楚當地既租車公司.

關島同塞班島都係用美金, 講美式英文, 又多美軍設施, 其實係好似去左美國

路過一間專租甲蟲車的公司, 本黎有架開薘嘅, 可惜黎遲一步, 比人租左. *關島同塞班島一樣都係左軚的

塞班島有4/5個大嶼山咁大, 我地只係沿岸揸左一陣, 都無環島一圈

路上遇到一個潛水點

望落下面藍藍發光的, 可惜我地唔識潛水, 感受唔到下面嘅美麗

關島同塞班島隨時會見到的海邊同岩石

石碑上寫住”塞班和平觀音”

一群望海嘅墓碑

真係好難想像响咁靚嘅地方, 發生過二次大戰幾場嘅戰役

二戰遺留落黎嘅大炮

二戰遺留落黎嘅坦克車

去睇珊瑚嘅玻璃船

水底下都有二戰遺留落黎嘅坦克車

二戰遺留落黎嘅戰機

我地唔識潛水, 只係玩下浮潛. 因為响關島已試左, 响塞班島就無再試. 感覺呢帶嘅海水好咸

當地都有唔少出海釣魚團, 釣到食唔曬嘅會有人黎收購

有日行行下, 忽然遇到一群鹿, 無日本果D咁為食

路上遇到鹿之外, 亦遇到大家樂! 當然就唔係香港果間啦

希望有機會再黎呢幾個島影貓!

交通資訊

未有直航的日子, 我地係先去關島, 然後再由轉去飛機. 關島飛塞班島太約50分鐘.

離開關島

飛過羅塔島, 唔知羅塔島有冇貓呢?

塞班島比香港快兩個鐘.

989 total views, 1 views today

發表迴響

你的電子郵件位址並不會被公開。

Bitnami