島上遇到貓 ~ 玄界島 (genkaijima)

响我心目中, 只要係有貓嘅島, 我都會叫佢做貓島.

唔記得由幾時開始, 我去旅行嘅主要目的, 就是為左影當地嘅貓, 無貓出沒嘅地方, 我係唔會考慮.

睇番之前嘅相, 自己都去過幾個貓島, 兩年前開始, 就想專注影貓島, 希望儲一個貓島系列嘅相.

第一個想同大家分享嘅是玄界島. 玄界島是在福岡附近嘅一個離島.

我出名黑仔, 旅行遇到落雨已是常態, 唔打風已算是好彩. 計劃好去玄界島嘅一朝, 亦都係落雨. 我唔係當地人, 而且每人對於氣溫都有唔同感覺或愛惡, 我只可以同大家講, 6月中時我去左8日, 當中有兩日落傾盆大雨. 唔落雨既日子, 一早一晚會比較涼, 20度左右. 下畫就頗熱, 30度左右. 响島上有風會涼少少. 响城市入面就感覺熱好多. 但因為無香港咁潮濕, 無熱得咁辛苦. 當然, 日本嘅夏天同香港一樣, 都係打風嘅季節.

坐船時心情就當然同個天色一樣咁灰, 但泊岸後一落船, 就見到成十幾隻貓圍住三個釣魚伯伯, 心情即刻晴朗過晴朗.

大家都响度等魚上釣

玄界島同大過坪洲少少. 官網有列出幾個景點, 因為落雨我地無行到, 大家有時間有興趣可按圖索驥: http://genkaijima.com/spot/  玄界島係有路可以環島行一圈, 可惜落雨無行到. 島上面有間小商店, 因為我地去果日係星期日無開, 所以唔知裡面有乜野賣. 如果大家諗住影得耐嘅話, 穩陣就上船前買定野食. 野飲就唔使擔心, 因為汽水機响日本係無處不在嘅.

我地响碼頭附近民居行左陣就開始大雨要折返. 釣魚伯伯都已收杆.

岩岩果時有漁船返黎, 成班貓就走晒過去. 漁船泊好後, 漁民就開始搬D漁獲上岸. 漁獲搬上岸後, 漁民就會開始揀魚, 岩size 靚嘅就會放入發泡膠盒, 然後鋪冰上面, 最後封好送貨. 其他嘅就會比貓食, 嘅環保又唔浪費.

好有秩序咁排隊等魚食. 我就响後面排隊等影相

你話漁民對D貓好唔好? 鍾唔鍾意貓? 愛唔愛貓? 我唔識講, 我只係見到, 呢D就係佢地嘅日常生活. 人貓共存每日都發生嘅平常事.

漁船幾多點會返黎, 我無問到. 而且幾隻返黎嘅船, 大部份嘅唔多魚. 上次去田代島, 果邊嘅漁船就會凌晨5點返黎! 所以大家去到嘅時候, 如果咁岩遇到有漁船返黎, 在唔影響人地做野嘅情況下, 可以响側邊觀察下.

至於點解貓食魚唔會骾骨, 我希望National Geographic或Discovery Channel將會有特輯講解一下 , 因為我都好想知道. 另外點解貓就咁食刺身唔會肚痛, 我亦都係答唔到.

可能平日唔多人黎影相, 再加上見到我地唔係本地人, 漁民對我地都nice. 有問我地從邊度黎. 有個每次見貓搶魚就係咁提我shutter chance, shutter chance. 當然, 我都盡量企開用長鏡影, 唔阻住佢地做野.

呢條好似我地嘅牙帶叫太刀魚 [http://www.zukan-bouz.com/syu/%E3%82%BF%E3%83%81%E3%82%A6%E3%82%AA]

朝早見D貓爭食太刀魚, 咁岩夜晚响居酒屋見到有得賣, 就叫一碟黎試下, 結果係我嘅口味同佢地唔一樣.

如果唔係落雨, 我諗我可以响玄界島影足一日.

最後, 如果你係好似我咁, 去日本唔想聽到廣東話嘅話, 玄界島絕對係零廣東話.

有貓接船, 亦有貓送船

交通資訊

由博多或天神出發, 坐西鐵巴士到”博多ふ頭”, 唔塞車嘅話十五至二十分鐘就到. 自已揸車嘅話, 碼頭附近有停車場. 西鐵巴士和地鐵都有Day Pass, 種類繁多, 建議花少少時間研究一下, 睇下邊隻最岩你嘅行程. 官網有繁體中文: http://www.nishitetsu.jp/zh_tw/ 另外佢地有個app可以方便搵車:

http://www.nishitetsu.jp/bus/app/busnavi/ 界面有英文.

碼頭可以去幾個唔同嘅地方: 玄界島, 志賀島, 壱岐島同最近韓國嘅対馬島. 志賀島見有人影到貓, 但唔多, 最後都是無去. 壱岐同対馬都想去, 尤其是対馬獨有嘅対馬山猫, 但可惜太遠, 船期夾唔到, 希望第日有機會去.

碼頭

船嘅外觀

船倉入面

船嘅班次算係密, 每日有7班. 最update嘅船費同船期, 出發前最好去官網check多清楚: http://genkaijima.com/access/http://port-of-hakata.city.fukuoka.lg.jp/guide/ferry_city/hyo.html#h03 無特別註明, 應該是一年365日都開.

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次.  夏季同冬季亦可以分有兩組唔同嘅班次. 一個唔留神, 好容易就會睇錯隔離班次.  另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

4,254 total views, 7 views today

您可能也會喜歡…

發佈留言

發佈留言必須填寫的電子郵件地址不會公開。

Bitnami